இறைவர் திருப்பெயர்: தயாநிதீஸ்வரர், குலைவணங்கீசர், வாலிநாதர், சிட்டிலிங்கநாதர்.
இறைவியார் திருப்பெயர்: ஜடாமகுடேஸ்வரி, அழகுசடை முடியம்மை.

கோங்கமே குரவமே கொழுமலர்ப்
புன்னையே கொகுடிமுல்லை
வேங்கையே ஞாழலே விம்முபா
திரிகளே விரவியெங்கும்
ஓங்குமா காவிரி வடகரை
யடைகுரங் காடுதுறை
வீங்குநீர்ச் சடைமுடி அடிகளா
ரிடமென விரும்பினாரே

என்று தொடங்கி "ஆளுடைய பிள்ளையார்" அருளிச்செய்த அற்புதமான திருத்தலம்.


மேவடகுரங்காடுதுறை (ஆடுதுறைபெருமாள்கோயில்) கோயில்

அமைவிடம்: கும்பகோணம் - திருவையாறு, சாலையில் சுவாமிமலை, உமையாள்புரம், கபிஸ்தலம் தாண்டி, உள்ளிக்கடை என்னும் ஊரையடுத்து இத்தலம் - ஆடுதுறை உள்ளது. (ஆடுதுறை என்ற பெயரில் மற்றொரு தலம் இருப்பதாலும், இத்தலத்திற்குப் பக்கத்தில் பெருமாள்கோயில் என்னும் வைணவத்தலம் இருப்பதாலும் இத்தலம் 'அந்த' ஆடுதுறையினின்றும் வேறுபட்டறிய "ஆடுதுறை பெருமாள்கோயில்" என்று வழங்குகிறது. குரங்காடுதுறை என்று கேட்டால் யாருக்கும் தெரிவதில்லை) இத்தலம் குடந்தையிலிருந்து 20 கி. மீ. தொலைவிலும், திருவையாற்றிலிருந்து 5 கி. மீ. தொலைவிலும் உள்ளது.

நிற்க. மேற்கூறிய ஆலய அமைப்பு சோழ நாட்டிலுள்ள மற்றைய ஆலயங்களிலிருந்து சற்று மாறுபட்டுள்ளது. ஆதிதளத்தின் பத்திப்பிரிப்பு அமைப்பிலிருந்தே இவ்வாலயம் நிச்சயம் ஆதிதளத்திற்கு மேல் கூடுதலாகத் தளங்கள் பெற்றுள்ளது என்பதை உணரலாம். பொதுவாக ஆதிதளத்தின் ஆரச்சுவர் பூமிதேசத்தின் மேல் காட்டப்படும். இவ்வாலய அமைப்பு சற்று மாறுபட்டு ஆதிதளக் கூரைமுடிவில் மேல் உள்ள பூமிதேசத்திலிருந்து இரண்டாம் தளம் நேரடியாக எழுகிறது. இந்த இரண்டாம் தளம் ஆதி தளம் போன்றே முறையான பத்திப் பிரிப்புகளுடன் விரிந்து கூரை உறுப்புகள் பெற்றுக் கபோதத்துடன் முடிவடைகிறது. ஆனால் இரண்டாம் தளத்திலிருந்து மேலெழும் மூன்றாம் தளம் முறையான ஆர உறுப்புகள் பெற்று அழகாக முடிவடைந்து தளமுடிவில் கிரீவம் எழ சிகரம், ஸ்தூபி போன்ற விமான அங்கங்களைப் பெற்று விண்ணில் உறைகிறது.

திருவையாற்றுத் தடத்தில் பதிந்துள்ள மற்றுமொரு வரலாறு இந்த "வடகுரங்காடுதுறை".