பாடல் 82: கண்ணீரே வாழ்வாக!

மூலப்பாடம்:

கான்ஜி எழுத்துருக்களில்
思ひわび
さてもいのちは
あるものを
憂きにたへぬは
涙なりけり

கனா எழுத்துருக்களில்
おもひわび
さてもいのちは
あるものを
うきにたへぬは
なみだなりけり

ஆசிரியர் குறிப்பு:

பெயர்: புலவர் அட்சுயோரி

காலம்: கி.பி 1090-1179.

ஃபுஜிவாரா வம்சத்தைச் சேர்ந்த இவர் தலைநகரில் அரண்மனையில் அதிகாரியாக இருந்தாலும் இலக்கியத்தின்பால் கொண்ட ஆர்வத்தால் நடுத்தர வயதில் பணியிலிருந்து விலகி முழுநேரப் புலவராக ஆனார். பின்னாளில் ஒரு சிறந்த புலவராக ஆகவேண்டும் என்று இளவயதில் சுமியோஷி கோயிலுக்குத் தினந்தோறும் சென்று வேண்டியபடியே இருந்தாராம். எண்ணற்ற பாடல்போட்டிகளில் கலந்துகொண்டும் தானே போட்டிகளை நடத்தியும் வந்தார். வாழ்வின் இறுதிக்கட்டத்தில் உடல்நலம் குன்றியிருந்தபோதும் கவிதைப் போட்டிகளுக்குச் சென்று பாடல்கள் கேட்பதை வழக்கமாகக் கொண்டிருந்தார். வாழ்வின் கடைசிச் சில வருடங்கள் இவர் துறவறம் பூண்டிருந்தார்.

இவரது நண்பர் ஷுன்செய் என்பவர் சென்சாய்ஷூ என்றொரு காதல் பாடல்கள் தொகுப்பை உருவாக்கியபோது இவரது 18 பாடல்களை அதில் சேர்த்திருக்கிறார். பின்னர் அட்சுயோரி இறந்தபிறகு ஷுன்செய்யின் கனவில் வந்து நன்றி தெரிவித்ததாகவும் பதிவு செய்திருக்கிறார். இவரது தனிப்பாடல் திரட்டு இன்று நமக்குக் கிடைக்காத நிலையில் ஜப்பானிய இலக்கியத்துக்கு இவரது பங்களிப்பாக 41 பாடல்கள் இடம்பெற்றிருக்கின்றன.

பாடுபொருள்: வாழ்வின் துயர் கூறுதல்

பாடலின் பொருள்: துயரங்கள் தொடர்கதையாக இருக்கும் வாழ்க்கை முடிந்துவிடும் என நினைத்தால் வடிந்துவிடும் என நினைத்த கண்ணீர் வடியாமல் பெருகுவதைப் போல வாழ்வும் தொடர்ந்து கொண்டிருக்கிறது.

வாழ்வின் துயரைக் கூறும் எளிமையான பாடல். காதல் தோல்வியால் ஏற்பட்ட விரக்தியில் எழுதப்பட்ட பாடல் என்று முதலில் தோன்றினாலும் வாழ்வின் வெறுமையைப் பாடுகிறது என்பதே பொருத்தமாக இருக்கிறது. பல்வேறு நேரங்களில் இவர் பல பாடல்களைப் புனைந்திருப்பதால் இப்பாடல் ஒருவேளை இவரது இளவயதில் ஏற்பட்ட காதல்தோல்வியைக் கூறுகிறதோ என்று தோன்றுவதையும் தவிர்க்க இயலவில்லை. காதல் பாடல்களின் தொகுப்பான சென்சாய்ஷூ தொகுப்பிலும் இப்பாடல் இடம்பெற்றிருப்பதால் உரையாசிரியர்கள் இவ்வாறு கருதுகிறார்கள்.

வெண்பா:

மாறுதல் வேண்டா மனிதரின் வாழ்வது
பாறுதல் ஒன்றே வழியெனக் - கூறுவர்
ஆயின் முடிவறு கண்ணுகு நீர்போல்
முடிவற்று நீள்வது வாழ்வு

பாறுதல் - அழிதல்

(மீண்டும் அடுத்த தான்காவில் சந்திப்போம்)

இக்கட்டுரை சொல்வனம் இதழில் வெளியானது.