சென்ற முறை கொடுக்கப்பட்ட கல்வெட்டுப் புகைப்படத்தைப் பார்த்து பலரும் பல வகையில் கடிதம் அனுப்பியிருக்கின்றனர். ஒரு சிலர் கல்வெட்டில் உள்ள பல சொற்களையும் கண்டுபிடித்து எழுதியிருக்கிறீர்கள். சரி நீங்கள் படித்தவரை கீழே கொடுக்கப்பட்டுள்ள கல்வெட்டு வரிகளைக் கொண்டு சரிபார்த்துக்கொள்ளவும்.

ஸ்வஸ்திஸ்ரீ: ஏதத் வி
ஷ்ணுப ஷ்ரேணி மௌ
லி மாலோப லாலி
தம் ஸாஸநம் ராஜரா
ஜ ஸ்ரீராஜகேஸரி வ
ர்மண: உடையார் ஸ்ரீ ரா
ஜராஜதேவர் திருவா
ய் மொழிந்தருள இத்திருச்சு
ற்று மாளிகை எடுப்பித்த
ன் ஸேநாவதி சோழ மண்டல
த்து உய்யக்கொண்டான் வ
ளநாட்டு வெண்ணாட்டு அம
ன்குடியான் கேரளாந்தகச் ச
துர்வேதிமங்கலத்து ஸ்ரீக்ரு
ஷ்ணந் இராமனான மும்ம
டி ப்ரம்மரராயன்

சிலர் கல்வெட்டில் உள்ளது ஒன்றும் புரியவில்லை என்று எழுதியிருக்கிறீர்கள். முயன்றால் முடியாததும் உண்டோ! நான் முன்பே குறிப்பிட்டிருந்த படி 6 வரியில் உள்ள வர்மண: வரை கிரந்தச் சொற்கள். அவற்றை படிக்க முயன்றுவிட்டு முடியவில்லை என்றால், சரிதான். நானும் கூட இப்பொழுது தான் கிரந்தச் சொற்கள் படிக்கக் கற்றுவருகிறேன். அடுத்து வரும் தமிழ் சொற்களையும் படிக்க முடியவில்லை, ஒரு சில எழுத்துகளை அடையாளம் கண்டுபிடித்துவிட்டோம் என்று சிலர் எழுதியிருந்தனர். முதலில் படிக்கும்பொழுது தனித்தனி எழுத்துகளை அடையாளம் கண்டுபிடித்தாலே நல்ல முன்னேற்றம் என்று தான் கூறவேண்டும்.

கல்வெட்டு படிக்க தேவையான ஒரு பண்பு இருக்கிறது. பொறுமை. ஆம் பொறுமை மிக மிக அவசியம். முதலில் எழுத்துகளை கண்டுபிடித்து, அவற்றை சேர்த்து கோர்வையான சொற்றொடர்களாக அமைக்க வேண்டும். உதாரணத்திற்கு உடையார் என்ற சொல்லை எடுத்துக்கொண்டால், உ, டை, ய மூன்றும் நன்றாக தெரிகிறது. அடுத்து இரண்டு கொக்கிகள் போல் வளைந்த கோடுகள் உள்ளன. இங்கே காலிற்கும் (¡) 'ர' வுக்கும் வித்தியாசம் இல்லை. ர ர என்று அடுத்து அடுத்து வரமுடியாது. ஆகவே அதில் ஒன்று ¡, ஒன்று ர. இது தெரிந்தவுடன் சொல்லை கண்டுபிடித்துவிடலாம் தானே. உடையார் தவிர வேறெதாக இருக்கமுடியும். ர என்ற ஒரு எழுத்தே எந்த சொல்லில் உபயோகப்பட்டிருக்கிறதோ அதற்கு ஏற்றார் போல் அமைக்கப்பட்டிருக்கிறது.

உதாரணத்திற்கு ராஜராஜ என்ற சொல்லில் இருக்கும் 'ர' கிரந்த 'ர'வாகும். கடவுளின் பெயர், அரசனின் பெயர் அல்லது பட்டம் இவற்றில் கிரந்த எழுத்துகளை உபயோகிக்கும் வழக்கம் இருந்திருக்கிறது. உடையார், கேரளாந்தகன் இவற்றில் வரும் 'ர' தமிழ் 'ர'. இப்படி இருவகையான எழுத்துகளை கல்வெட்டில் உபயோகிப்பதாலும் சிறிது குழப்பமேற்படும். ஆனால் கல்வெட்டினை படிக்க படிக்க இவையெல்லாம் உங்களுக்கு தெள்ளத் தெளிவாக விளங்கிவிடும். மேலும் கல்வெட்டினை எப்பொழுதும் படித்துக்கொண்டே இருக்க வேண்டும். நடுவில் ஒரு மாதம் போல் படிக்காமல் இருந்துவிட்டு, சட்டென்று ஒரு கல்வெட்டை பார்த்தால் படிக்க சற்று சிரமமாகவே இருக்கும். நான் முன்பு கொடுத்திருந்த கல்வெட்டுப் புகைப்படங்களை, அடுத்த இதழ்களில் கொடுக்கப்பட்டிருக்கும் கல்வெட்டு வரிகளின் உதவியுடன் ஆராய்ந்து பார்க்கவும். ஒவ்வொரு எழுத்தும் கல்வெட்டில் எப்படி உள்ளது, எப்படி சொற்களாக அமைக்கப்பட்டிருக்கிறது என்றெல்லாம் பாருங்கள்.

சரி உங்களுக்காக இதோ ஒரு பிற்காலத்திய கல்வெட்டு.



இக்கல்வெட்டு காஞ்சீபுரம் கைலாசநாதர் கோயிலில், தூணில் உள்ள ஒரு கல்வெட்டின் ஒரு பகுதி.

படித்துவிட்டு உள்ளீட்டுப் பகுதியில் விடையிடுங்கள்.

this is txt file